Kontador prepagu difikulta povu komunidade

POVU SAI VITIMA BA TEKNOLOJIA TANBA MEUS NE'E DIFIKULTA POVU

 konttador prepagu ba eletrisidade

A. PRELIMINÁRIU

Prezensa siénsia no teknolojia iha mundu óras dadun tama ona ba faze kontemporanea, ne’ebé kompetetivu n’udar meius global hodi responde nesesidade ema moris nian. Maneira utilizasaun produtu teknolojia sira, kuaze halo mundu ne’e sai klo’ot no besik. Enerjia eletrisidade sai xave importante ba kriasaun industria inklui nesesidade iha edifisiu, uma-familia, trafiku, ….nsst. Maibe presiza konsidera mós katak, konsumidór barak mak sai hela vitima ba teknolojia, ne’e haree husi aspetu de uzu no nia presu. Ita nia rain Timor-Leste tenta adapta evulusaun sira ne’e, liu husi desizaun nivel kompetente. Iha artigu ida ne’e, nu’udar parte ida husi kontribuisaun de ideia. 

Koalia kona-ba politika governu, atravéz Sekretariu Estadu ba Eletricidade, sobre utilizasaun “kontadór prepagu”. Razaun instala kontadór prepagu atu fasilita komunidade sira bele selu kustu eh presu enerjia eletrisiade nian ho efetivu. Medida ne’e iha nia vantajen no mós dezvantajen hodi kria interasaun entre komunidade ho ukun-nain. Presiza konsidera katak, Komunidade mak povu ne’ebé sai nain ba soberania husi nasaun independente ida, ne’ebé define tuir lei sira hodi prevé dever no direitu sidadania hodi haktuir natureza, sosiu, politika no ekonimika rai ida-idak nian. Nasaun ne’ebé forte wainhira entidade tomak iha kolabórasaun hodi hatúr ás interese komun husi interese individu, ne’e katak involve ema tomak liu-husi asaun partisipativu no interasaun hodi hamosu kritika konstrutivu sira, nune’e bele hiit ás kualidade sidadaun nia ba hulan lisun knar foti rain no sosiedade. Sikun seluk ida mak kualidade sidadaun iha degradasaun sosiu-ekonomiku, inklui distansia ba assessment. 

B. PROBLEMA NE’EBÉ PRESIZA ATUA

Kontadór prepagu kria problema sira ne’ebé durante ne’e akontese iha komunidade, kona-ba utilizasaun enerjia eletrisidade mak hanesan: 

1. Mosu ligasaun illegal, katak halo koneksaun ketak iha input kaixa prepagu nian, 

2. Wainhira ahi mate mak sei difikulta komunidade iha área rurál atu sosa pulsa (pulsa fán de’it iha kapital distritu), 

3. Komunidade balun nia uma hetan ligasaun eletrisidade, maibe ahi lalakan, problema tanba de’it laiha osan atu sosa pulsa. 

C. ALTERNATIVA 

Autoridade kompetente presiza konsidera delivera katak, kontadór eletrisidade ne’ebé atu uza eh instala ba konsumidór sira nia uma, labele ho forma linear/ uniforma. Presiza mós distinji problema iha komunidade antes halo desizaun hanesan: 

1. Kontadór prepagu katak, presiza ense pulsa foin ahi lakan, ne’e kategoria iha área urbanu ba emprejariu, negosiate, no funsionariu públiku sira. 

2. kontadór konvensional / Nominal current (In), selu tuir nia nesesidade de uzu, ne’e kategoria ba komunidade iha área rurál, no oportuna liu ba kbiit laek sira. 

D. REZUMU 

Prezensa Siénsia no teknolojia tanba de’it responde nesesidade ema moris nian, dala ruma kria konfuzaun mos iha prosesu utilizasaun, inklui nia presu eh kustu. Enerjia eletrisidade sai xave importante ba kriasaun industria inklui nesesidade familiar. Kontadór prepagu iha vantajen ba fasilita pagamentu presu enerjia, mezmu difikulta mós komunidade ne’ebé moris iha área rurál no sira ne’ebé kbiit laek. Povu iha dever no direitu ne’ebé hanesan, maibe presiza atu konsidera degradasaun sosiu-ekonomiku ne’ebé eziste. 

Romeo Verdial (Fitun Mutin)